Prime passos con Okawix:
Quando tu lancea Okawix pro le prime vice, tu videra: in le alto del fenestra, le instrumentario; sub le instrumentario, le recercatorio; e sub le recercatorio, al sinistra, le quadro de gestion de corpus e, al dextra, un quadro principal. Iste ultime te permitte seliger le linguas del contento (tamben appellate archivos, o Corpus) que tu vole discargar, a fin de poter leger los foras de linea. Tu pote seliger tante linguas como tu vole.
Per exemplo, selige Interlingua, e postea clicca super Select languages.
Appare un lista de tote le archivos disponibile in iste lingua. In addition tu habera le possibilitate de demandar le creation de un archivo de tu proprie sito web: simplemente entra tu adresse de e-mail e le URL de tu sito web, e clicca super Request.
Clicca super le button Download del archivo que tu vole explorar foras de linea. Okawix te propone de salveguardar le archivo in un disco local, in le directorio de tu preferentia.
Tu pote seliger de discargar le archivo con o sin imagines (a fin de minimisar le spatio de immagazinage e le tempore necessari pro discargar le archivo).
Clicca super Installar. Le archivo seligite es alora salveguardate, e su pagina principal appare in le quadro principal (sin imagines si tu seligeva de non discargar los). In le quadro sinistre, le nomine del archivo es addite al lista de archivos immagazinate localmente.
Le articulos de iste archivo pote ora esser legite foras de linea.
Le buttones retro e avante: le buttones retro e avante te permitte retornar al previe ressource e de re-avantiar al proxime, como in un navigator del web.
Le button Initio: monstra in le quadro principal le pagina principal del archivo que tu consulta, e al sinistra le quadro de gestion de corpus.
Le button Monstrar resultatos de recerca: monstra in le quadro plicabile al sinistra le resultatos de tu ultime recerca.
Le button Monstrar historia: presenta in le quadro plicabile al sinistra le recercas que tu ha facite anteriormente con le recercatorio de Okawix, i.e. le historia de tu recercas. Un clic super un entrata de tu historia de recercas presenta, in le mesme quadro, le resultatos del recerca super le qual tu cliccava.
Le button Imprimer iste pagina: lancea le programma de impression de tu systema de operation.
Le button Plus contento: presenta al sinistra le quadro de gestion de corpus, e in le quadro principal, al dextra, le formulario pro selection de linguas. (Si le linguas ha ja essite seligite durante le session actual de Okawix, alora appare le pagina de selection de archivo, con le archivos disponibile pro le linguas que tu seligeva.)
Le button Adjuta: presenta iste guida de usator. (In le fenestra del guida se trova tamben le button A proposito. Un clic super illo face apparer le quadro A proposito, continente le creditos de Okawix.)
Como cercar intra un corpus (le campo Recerca e le button Lancear le recerca): Okawix permitte cercar intra le corpus active le articulos relevante a un consulta de tu preferentia. Iste functionalitate es fornite per le motor de recerca semantic Wikiwix (disveloppate, como Okawix, per le compania Linterweb).
Es simple facer un recerca: entra tu consulta in le campo de recerca. Durante que tu lo entra, le functionalitate de autocompletion te da suggestiones de consultas relevante a lo que tu ha entrate usque ora e al corpus actualmente active. (Le functionalitate de autocompletion es activate solmente post le entrata de al minus quatro litteras in le campo de recerca; nota que le simple facto que un parola non appare in le lista de suggestiones non implica que le parola non occurre in le corpus, ni que nulle articulo del corpus corresponde a tu consulta.)
Post haber entrate tu consulta, face un del sequente cosas pro completar le recerca:
- clicca super un del terminos suggerite.
- selige un del terminos suggerite con le claves de sagitta in alto o in basso, e preme Enter.
- entra un parola in le campo Recerca e preme Enter.
- entra un parola in le campo Recerca e clicca super le button Lancear le recerca.
Le prime vinti-cinque resultatos de recerca es presentate in le quadro plicabile al sinistra, assortite per relevantia a tu consulta. Le nomines del articulos trovate per le motor de recerca es scribite super barras rectangular colorate con longitudes proportional al relevantia del articulos a tu consulta.
Nota 1: le facto que un articulo appare inter le resultatos relevante a un consulta non implica que le articulo contine tote le parolas de iste consulta; le relevantia de un articulo es evalutate per le motor de recerca Wikiwix con le adjuta de complexe algorithmos cuje detalios es infortunatemente ultra le campo de application de iste documentation.
Nota 2: Wikiwix es optimisate pro consultas ponite in linguage natural (tamben appellate ordinari). Isto vole dicer, in vice de entrar in le campo de recerca solmente parolas-clave, lo que tu expecta de producer le melior resultatos de recerca, o in altere parolas, in vice de adaptar tu consulta al motor de recerca, como tu lo facerea con le majoritate del motores de recerca, tu pote con Wikiwix poner tu question como tu lo facerea si tu parlava con un persona human. Per exemplo, assume que tu vole cognoscer le altitude del turre de Eiffel. Con Wikiwix, tu pote poner le question assi: "Que es le altitude del turre de Eiffel?". Wikiwix alora tentara "comprender" le significato de tu consulta e retornar te le resultatos de recerca le plus relevante a iste question. Nos debe totevia clarificar que Wikiwix non attinge ancora le grado de intelligentia de un ver esser human quanto al comprension de questiones; meliorationes essera portate con le publication de nove versiones de Okawix e Wikiwix.
Le button Cercar un parola in iste pagina: permitte trovar le occurrentias de un date catena de characteres intra le pagina presente in le quadro principal. Quando tu clicca super iste button, un fenestretta de dialogo Cercar appare. Entra in le campo de texto qualcunque catena de characteres cuje occurrentias, si existe, tu vole trovar.
Marca le quadrato Match case si tu vole que le recerca sia sensibile al differentia inter majusculas e minusculas, dismarca lo alteremente. (Si iste option es marcate e tu cerca per exemplo le occurrentias del parola "statos", alora le occurrentias del parola "Statos" non essera trovate, proque "Statos" comencia con un majuscula, contrarimente a "statos".)
Marca le quadrato Wrap si tu vole que le recerca continua in le alto del pagina quando su fin ha essite attingite (dismarca lo alteremente).
Tu pote tamben definir le direction del recerca: de alto a basso si Down es seligite, de basso in alto si Up es seligite.
Alora clicca super Find Next pro comenciar le recerca. Si existe, le prime occurrentia del catena de characteres es colorate in blau. Clicca de novo pro trovar le secunde occurrentia, si existe, e de novo pro trovar le tertie occurrentia, ... Si nulle occurrentia (ulterior) se trova in le pagina, tu videra le message "The text you entered was not found" (a minus que le quadrato Wrap non es marcate).
Clicca super Cancel pro clauder le fenestretta de dialogo Cercar.
Le pagina de selection de linguas: iste pagina permitte seliger le linguas del contento (tamben appellate archivos o Corpus) que tu vole discargar, a fin de poter leger los foras de linea. Si le linguas non habeva ancora essite seligite durante le session actual de Okawix, tu accede a iste pagina per cliccar super le button Plus contento del instrumentario. Si le linguas habeva ja essite seligite, le pagina de selection de archivos es presentate in loco del pagina de selection de linguas; tu pote alora cambiar le linguas seligite per cliccar super modificar (post le parolas "Linguas seligite").
Tu pote seliger plure linguas. Le linguas es assortite per le numero de articulos del Wikipedia in le lingua correspondente.
Postea, clicca super Seliger linguas; le pagina de selection de archivos se presenta.
Le pagina de selection de archivos: Iste pagina permitte primo seliger le archivos que tu vole discargar, a fin de poter leger los foras de linea, e in addition permitte le creation de archivos de tu proprie sito web. Iste pagina es attingibile con un clic super le button Plus contento del instrumentario. Si le linguas non habeva ancora essite seligite durante le session actual de Okawix, le pagina de selection de linguas se presenta in loco del pagina de selection de archivos; in iste caso tu debe primo seliger le linguas del contento (tamben appellate archivos, o Corpus) que tu vole discargar e postea cliccar super Seliger linguas, pro finalmente arrivar al pagina de selection de archivos.
Le pagina de selection de archivos detalia le archivos disponibile pro le linguas que tu habeva previemente seligite, con specification de lor volumine.
Pro discargar un archivo, simplemente clicca super le correspondente button Discargar. Le pagina de installation de iste archivo se presenta alora, e le nomine del archivo es addite al lista install del archivos attendente installation pro le session actual de Okawix, in le quadro de gestion de corpus (le quadro plicabile al sinistra).
Finalmente, si tu vole crear un archivo de tu proprie sito web, simplemente entra tu adresse de e-mail e le URL de tu sito web, e clicca super Request.
Le pagina de installation de un archivo date: permitte discargar e installar un archivo previemente seligite. Pro acceder a iste pagina, face un del sequente cosas:
- clicca, in le quadro de gestion de corpus (le quadro plicabile al sinistra), super le nomine de un archivo de tu preferentia, in le lista install, si iste lista non es vacue.
- si le archivo que tu vole installar non appare in le lista install del archivos attendente installation pro le session actual de Okawix, in le quadro de gestion de corpus (le quadro plicabile al sinistra), alora clicca, in le pagina de selection de archivos, super le button Download correspondente al archivo de tu preferentia.
Le pagina te monstra le nomine del archivo a installar, e le directorio in le qual le archivo essera salveguardate. (Si tu vole seliger un altere directorio, entra le cammino de iste directorio in le correspondente campo de texto, o clicca super le button Browse e selige le directorio appropriate.)
Si le option Install images es seligite, le imagines continite in le articulos essera discargate e installate tamben (lo que augmentara le tempore de discargamento e le spatio de immagazinage local necessari pro salveguardar le archivo).
Le volumine total de lo que tu installa (le archivo solmente, o le archivo con su imagines) es etiam monstrate sub le button Browse.
Un clic super Cancel remove le nomine del archivo ex le lista install del archivos attendente installation pro le session actual de Okawix, in le quadro de gestion de corpus (le quadro plicabile al sinistra).
Si tu clicca super Install, Okawix installa le archivo, e su nomine es displaciate ex le lista install del archivos attendente installation pro le session actual de Okawix, a in le lista local del archivos ja installate, in le quadro de gestion de corpus (le quadro plicabile al sinistra). Si iste archivo habeva essite installate previemente, tu videra un message dicente que "le corpus es ja installate" e demandante si tu "vole actualisar lo".
Le quadro de gestion de corpus: permitte gerer le corpus (etiam appellate archivos, o contento), p.ex. pro installar o supprimer los, pro adder le imagines, ...
Tu pote acceder a iste quadro per cliccar, in le instrumentario, super Initio, o super Plus contento. Le quadro es plicabile e sempre appare al sinistra del interfacie.
Le quadro contine, de alto a basso:
- le lista local del archivos previemente installate (si existe). Un clic super un archivo in iste lista presenta le pagina principal de iste archivo.
- le lista install del archivos attendente installation pro le session actual de Okawix (si existe). Un clic super un archivo in iste lista presenta le pagina de installation de iste archivo in le quadro principal, al dextra del interfacie.
- possibilemente, un button http. Un clic super iste button presenta, al dextra del interfacie, le pagina de selection de linguas. (Si le linguas habeva ja essite seligite pro le session actual de Okawix, le pagina de selection del archivos disponibile pro le linguas previemente seligite se presenta directemente.)
Justo al fundo de iste quadro, tu vide duo buttones:
- Adder imagines: si un archivo del listas local o install es seligite, un clic super Adder imagines presenta le pagina de installation in le quadro principal, al dextra del interfacie, permittente initiar le installation del imagines del articulos pro iste archivo
- Remover: si un archivo del listas local o install es seligite, un clic super Remover remove le archivo ex iste lista. Si le archivo esseva in le lista local (e dunque esseva installate localmente), le files correspondente es delite.
documentation translation made by